社區園圃，開田日

2/10，第一次抽中園圃，得知九時抽籤，當然早少少到達啦．
晨咁早八點三出到天后，早餐都未有時間食，坐小巴，話咁快上到去．
朋友原提議坐的士，其實真係唔知點講，手上的長桿有成二米，
坐的士放不下，上山多彎，都咪話不驚．

好似是我們最早到，人影都無個，位於山上，空氣清新，周圍無大馬路，亦清靜．
唯一缺點是沒自來水，無食水提供，只有兩個流動旱厠．
平日行山訓練有素，最多自帶水，小心點，無問題既．
導師未到，先看工作人員May姐，陳小姐開田，學到吓野架．

導師姓楊，等到九時多抽籤，也許她以為所有人都是這區常客，無咩講解，
見唔對路一問，才知這邊做法是由職員抽人名，依順序分配到１－５０號田．
早知這樣抽，就不用大早親身上到來，又空坐著等運到了．

抽完田，到導師講解時間，很有趣是她將公文袋中已有資料：
各種作物的下種及收成時間表，另有成長日數，抽了部份作物來講．
聽聽下，額外資料是有的，但無咩系統，不對路，乘機閃人．
其實若果自己一支公，又唔趕時間，又真係咩都未知，上下都無妨；
但時間不夠用，成班朋友係度，做好自己野先啦．亦明白為何有人話不上堂亦得．

話說回頭，前一晚才得知未買到熟石灰，雖則泡打粉同樣可中和酸性，
但基於石灰的低溶性，還是派朋友到上環走一趟，我們在山上先行努力開墾，
加好肥料待石灰到再混合多一次．

其間見到很多園友落肥好似不用錢似的，更加深要加石灰的決心：
個個咁落肥法，ｄ泥一定偏酸．
辛苦了做跑腿的朋友，其實他都好想玩開田架，
但無計啦，抽中名的不能走，知過程的走不開，下次有田，最多留番哂給佢開呀．

我塊田有好肥好肥的長蚯蚓，不錯，朋友的那邊就有好多上手落左種依家先發的菜苗．
上環菜種行星期日十時才開門，朋友買完很快亦上到黎，叫做玩左幾下，加好石灰，
混合好，耙好，加黑膠袋，起埋幾支長竹，跟住下山吃飯買其他竹去．

原來北角區找個地方飲茶一點都不容易，三四間酒樓，都沒位子．
最後去了城市花園那邊．吃飽飽就往吉吉出發，買好再回山上，
有園友大概剛到達不久，沒預備肥料等東西，沒得開田．
亦有園友不焗田，很快就將培好苗的下土，亦有即日播種的．
下午做好了個架，加好網，個網的絲太幼，要加工具免傷雀鳥，
放了夫水的氣，看看別人的作業，差不多五時，才下山吃下午茶去．

或許明天上午走一趟吧．

社區園圃，傻加固仔日4/10/2011

無經驗，買的網太幼，人同鳥都不易目視，基於不想無辜殺生，今日趕着做補救：
買尼龍繩加到網上，希望大家能看見，免生意外．

到雜貨店買了白色繩，在小巴上有位阿姨見到手上小苗，很有興趣的談起來，
我説不太認得路，誰知她更不清楚，又只顧找我談，幸好及時叫落車，否則就不知會去到哪了．
到達園圃是十二時多，一看，怎麼沒開門的？？？今日應該開放的呀？？
原來門外有指示：１２３０－１３３０是員工午膳時間，不作開放，只怪自己之前沒留意．

等待期間，先做好手作仔：將鋁罐，膠樽及繩先剪好，待會開門就可馬上開工了．
今天的負責人是馮小姐，因為只有我及另一園友在場，談天的時間多的是．
星期一至五負責員工是馮小姐，六日則是程小姐．
如果以為呢兩日落雨，ｄ泥會濕，咁就錯哂喇，乾到呢．簡單淋水在泥方便焗田，
處理好吹到亂作一團的焗田膠袋，放石塊壓好，加好吊物及繩，放好氣，今天工作完成．

下山去了間光顧了十多年的粉麫店，不是特別美味，吃的，大概是一份感情．